ILOILO CITY- Nagdepensa ang pamilya Agana sa mga akusasyon nga ginpulihan nila sa pagkastigo ang nagabusong nga si Lorry Mae Baylon nga gintunaan sang iya kamatayon kag sang ginadala nga anom ka bulan nga lapsag.
Sa interview sang Bombo Radyo kay retired PSSgt. Joseph Agana, iya ginpahayag nga ang iya pagpadulong sa balay ni Baylon ang may katuyuan lamang nga laygayan ini matapos nagwangal sang ginsaway sang retired police ang nagaginahod nga kabataan sang biktima.
Suno kay Agana, sang nagbaisay na ang mga ini kag nagkwa sang binangon ang biktima, iya ini gin-agaw agud nga malikawan nga may mapilasan pa kag gin-athag wala niya ginhanaan sang binangon ang biktima.
Dugang pa sang natungdan, ginsaway lang niya ang kabataan sang amo nga tion bangud nga nagakatulog ang iya bata nga nagatrabaho sa call center nga nagapahuway kon adlaw kag nagatrabaho kon gab-i.
Napalab-ot naman sa barangay ang reklamo ni Agana sadto tuhoy sa kagahod sang kabataan sang biktima kag may yara sila sang kasugtanan apang wala man gintuman ni Baylon.
Nagpangabay naman sa publiko si Agana nga indi sila paghusgaran bangud kaangay nga convicted na sila sa mata sang tawo nga wala man sang ihibalo sang kamatuoran.
Suno pa sa iya, ang video sa natabo kag ginpost sa social media ang makapamatuod nga sala ang akusasyon sang pamilya sang biktima batok sa ila.
Suno naman kay Jona Agana alyas Bebe, ginatudlo nga nagbali sa kamot sang biktima, ginkabnit lang niya ang butkon ni Baylon nga nagauyat sang binangon apang wala nila ini ginpulihan kastigo.
Pahayag niya, nagapangita nalang sa balasulon ang pamilya bangud sa nadangatan ni Baylon.
Dugang pa niya, kon nahulugan man kag napatay ang lapsag ni Baylon, ini bangod nga madamo ini sang bisyo kaangay sang pag-inom kag pagpanigarilyo.
Pahayag naman ni Alfred Amamyo, umagad sang retired police, imposible nga sumbagon niya sa nawong si Baylon bangud nga nagakugos ini sang pito ka bulan niya nga anak.
Suno pa sa iya, sa pagkamatuod, naurungan na lang siya sang amo nga tion gani wala gid siya makatandog sa biktima.
