ILOILO -Igalubong na sa Lunes, Agosto 12, ang pito sa miyembro sang pamilya Baguio kag Janson nga napatay sang natabo ang Iloilo Strait tragedy.
Sa interview sang Bombo Radyo kay Rommel Janson sang Cebu City, himata sang mga biktima, iya ginpahayag nga ginahaya subong ang bangkay sang pito ka mga biktima sa gym sang Brgy. Ermita, Cebu City.
Suno kay Janson, una nila nga nadesisyunan nga sa Dominggo, igalubong ang iya mga himata apang bangud sa pila ka sirkumstansiya, ila nga isulon sa Lunes ang lubong.
Ginpahayag ni Janson nga indi na nila luyag pa nga padugayon ang lubong sang ila himata bangud nga makatuga lamang ini sang kasubo kag kasakit sa ila pamilya.
Ila man nga hingyuon sa pari nga kun mahimo, sa gym na lang sang Brgy. Ermita patigayunon ang misa.
Nagahingyo man ang pamilya nga kun mahimo nga sa Cebu na lang igahatag ang financial assistance nga para kun tani sa pamilya Baguio bangud nga na-trauma na sila nga magbiyahe padulong sa Iloilo.
Samtang, ginkumpirma naman ni Joshua Grandeza, utod sang survivor nga si Ma. Nieves Grandeza, nga sa ila balay sa Brgy. San Miguel, Buenavista, Guimaras igahaya ang bangkay sang iya bayaw nga si Romeo Baguio Jr. kag hinablos nga si Jay Arvien Baguio.
Ginpahayag ni Grandeza nga buwas nga adlaw natalana nga pagadal-on sa ila balay ang bangkay sang duha.
Santo sa ila nadesisyunan, mahimo nga sa Agosto 24 ukon 25 ang lubong sang duha ka biktima.
