Desidido nga magpasaka sang kaso ang pamilya batok sa suspek nga nagsemento kag naglubong sa iya mismo nga magulang sa sulod sang ila balay sa Zone 2, Barangay Compania Central, Molo, Iloilo City.
Isa ka babaye nga naga-edad sang 65-anyos ang biktima; samtang naga-edad naman sang 45-anyos ang suspek nga isa naman ka lalaki.
Sa interview sang Bombo Radyo kay Police Captain Ryan Christ Inot, hepe sang Iloilo City Police Station 4, iya ginpahayag nga ginapreparar nila ang panumbungon nga murder.
Ginsaysay ni Inot nga nadiskubrehan ang krimen matapos nga gintawag sang iban nga utod ang ila nga magulang nga babaye agud magkaon apang wala ini nagasabat.
Sang nagsulod sila sa balay, ila nakit-an nga basa ang bahin sang lugar, bag-o pa lamang nasemento, kag may yara pa sang pinta.
Didto nakit-an sang pamilya ang lawas sang ila magulang nga babaye nga naputos sang mosketero, samtang nagabarikutot pa ang biktima kag nagagwa pa ang alatrasan.
Na-recover man sang kapulisan ang martilyo sa lugar nga ginapatihan nga mahimo may kaangtanan sa insidente.
Dugang pa ni Inot, antes natabo ang insidente, nabatian pa sang pamilya nga gina-akigan sang biktima ang suspek bangud sa ginakutkot sini sa sulod sang ila balay.
Ginpahayag sang pulis nga nagapaidalom sa rehabilitation ang suspek matapos sa iya nga bisyo. Sa subong, ginaimbestigahan kag ginalantaw sang kapulisan kun may rekord ang suspek sa pag-gamit sang illegal nga droga.
Yara na sa kustodiya sang kapulisan ang suspek matapos nga nadakpan man ini kagab-i.#
(By: Bombo Glenette Delit)
