POTOTAN, ILOILO – Dismayado ang pamilya bangud kasubong nga wala sang akto kag wala sang maathag nga sabat ang pamunu-an sang Bureau of Jail Management and Penology sa hinali nga kamatayon sang isa ka preso.
Sa interview sang Bombo Radyo kay Rolando Solacito, utod sang napatay nga preso, iya ginpahayag nga sang Hulyo 17 napatay ang iya utod kag pila pa ka adlaw antes sila nakahibalo.
Suno kay Solacito, makatilingalahan ang hinali nga kamatayon sang iya 44 anyos nga utod bangud nga wala man ini sang balati-an samtang yara sa jail facility sa Brgy. Nanga, Pototan, Iloilo.
Ginpahayag ni Solacito nga bangud nagbaho na ang bangkay sa hospital, gilayon nila ini nga ginpa-cremate kag wala sang paathag ang Bureau of Jail Management and Penology kun ano gid ang matuod nga natabo apang may yara sang lagob sa liog ang preso.
Sa pagkamatuod suno sa natungdan, antes pa man ang insidente, naka video call pa sa iya ang utod tuhoy sa dalagan sang ginakaulamiran nga kaso nga murder.
