ILOILO CITY–Nagapati ang pamilya Fontillas nga naulamid lang ang ila himata nga napatay matapos gin-ambush ang pinuno sang Amazona Brigade nga si Mercedes “Ging-Ging” Nava sa Brgy. Calajunan, Mandurriao, Iloilo City.
Sa interview sang Bombo Radyo kay Amy Fontillas, iloy ni Edwin alyas Erwin, sang R. Mapa St., Airport, Mandurriao, Iloilo City, iya ginpahayag nga wala sang kaaway ang iya anak sa ila lugar.
Sa pagkamatuod suno kay Fontillas, madamu ang nagasimpatiya sa iya anak nga vice president sang LGBT group sa distrito sang Mandurriao.
Bag-o pa man natabo ang insidente, iya pa nabati-an nga may nagtawag kay Edwin.
Santo sa iya nahibalu-an, magatabu-ay ang iya anak kag si Ging-Ging Nava sa Brgy. Calajunan kun sa diin natabo ang insidente.
Ginpahayag sang iloy, nga sang nagligad lang nga Nobyembre 2018 nagkilalahay ang duha bangud nga masami man nga aktibo si Erwin sa mga programa sa ila lugar.
Nakibot na lang sila sang nahibalu-an nga gin-ambush patay ang iya anak.
Samtang, mabuot nga sahi sang tawo ang napatay nga si Edwin Fontillas alyas Erwin matapos gin-ambush si Mercedes “Ging-Ging” Nava sa Brgy. Calajunan, Mandurriao, Iloilo City.
Sa interview sang Bombo Radyo kay Brgy. Kagawad Nonong Ferrer sang Airport, Mandurriao, Iloilo City, iya ginpahayag nga humalin sang una, wala siya sang may nabati-an nga may naka-away ang biktima.
Sa pagkamatuod suno kay Ferrer, masami nga nagabulig sa ila barangay si Fontillas ilabi na kun may yara sang ginapatigayon nga programa.
Si Fontillas suno kay Ferrer ang nagaserbe nga designer kag make-up artist sa tion nga may yara sang fiesta ukon ano man nga programa sa ila lugar.
Ginpahayag sang Barangay Kagawad nga mahimo nga naulamid lang si Fontillas sa kun ano man ang nahimo nga kapaltahan nga nahimo ni Nava.