BACOLOD CITY – Hugot nga ginabaton sang pamilya Zerrudo ang natabo sa ila himata nga ginatudlo miyembro sang Odicta Drug Group nga ginpatay sa Purok Katipunan, Brgy. Cabug, Bacolod City.
Nahibalu-an nga ang biktima amo si Nathan Zerrudo, 40, sang Pavia, Iloilo kag nasapwan nga tadtad sang bala ang lawas.
Sa interview sang Bombo Radyo kay Police Lt. Col. Ariel Pico, tagpamaba sang Bacolod City Police Office, iya ginpahayag nga wala na sang interes ang pamilya nga ipaidalom sa autopsy examination ang bangkay kag wala naman sang plano nga magpasaka sang kaso batok sa mga suspek.
Suno kay Pico, apisar nga indi na interesado ang pamilya Zerrudo apang magapadayon sa gihapon ang imbestigasyon agud nga mahibalu-an ang mga suspek sa krimen.
Ginpahayag ni Pico nga naangot sa Odicta Drug Group si Zerrudo bangud sa matrix nga gina-uyatan sang otoridad.
Santo sa imbestigasyon sa bangkay sang biktima, wala sang palatandaan nga gintorture ini antes ginpaarakan sang luthang.
Samtang, wala pa sang may nabaton nga official order ang Bacolod City Police Office tuhoy sa matuod nga rason sa pag-relieve kay Police Lt. Col. Jovie Espenido bilang Deputy for Operations kag Drug Enforcement Unit Chief.
Suno kay Pico, bisan siya ang nakibot sa pag-relieve sa pwesto kay Espinido bangud nga hinali lang ang nasambit nga order.
Sa pagkamatuod suno sa natungdan, naka-report na sa Camp Crame si Espinido sang iya nahibalu-an ang tuhoy sa relief order.
Nahibalu-an nga ang nasambit nga relief order ang kasunod sang ginapahayag pagkaulamid ni Espinido sa illegal drugs.
Anay Tokhang Surrenderee ang ginpatay nga miyembro sang Odicta Drug Group sa Purok Katipunan, Barangay Cabug, Bacolod City.
Sa interview sang Bombo Radyo kay Punong Barangay Wilbor Orada sang Tanza Esperanza, Iloilo City, iya ginpahayag nga sa ila lugar ginbun-ag kag nagdaku ang biktima nga si Nathan Zerrudo, 40, kag agot sa siyam ka mag-ululutod.
Suno kay Orada, sa iya pagkahibalo, lamharon na si Zerrudo sang nagsaylo ang ila pamilya sa Brgy. Cabugao Sur, Pavia, Iloilo apang bangud sa pila ka sirkumstanysa, nagbalik sa ila lugar ang biktima kaupod ang kaugalingon nga pamilya.
Ginpahayag ni Orada nga sadto, nakabaton siya sang impormasyon nga nakapalagyo sa isa ka drug raid si Zerrudo kag magluwas diri, wala na siya sang ihibalo tuhoy sa kabuhi sang biktima.
