SARA, ILOILO – Hustisya ang ginasinggitan sang pamilya sang napatay nga biktima sa natabo nga checkpoint Brgy. Zerrudo, Sara, Iloilo.
Sa interview sang Bombo Radyo kay Celda Hontiveros, iloy sang biktima nga si Adonis Hontiveros, iya ginpahayag nga nagkuha ang ila pamilya sang private lawyer agud makapasaka sang kaso batok sa tatlo ka mga pulis nga resonsable sa kamatayon sang iya anak.
Suno kay Hontiveros, tubtob subong, nagakasubo siya kag tuman nga nasakitan bangud sa kamatayon sang biktima.
Pila naman ka persona suno sa natungdan ang nagpalapit sa ila agud magtanyag sang bulig ukon areglo apang nagpanindugan sila nga dayunon ang pagpasaka sang kaso.
Nauna na nga nagdepensa ang Iloilo 2nd Mobile Force Company nga nagpalagyo sa checkpoint si Hontiveros kag nag-una palupok sang armas-luthang rason nga nagbalos man ang tatlo ka mga pulis nga sanday Patrolman Christopher Paclibar, Police Corporal John Michael Parsia kag Police Corporal Alfredo Bartulo.
