GUIMARAS – Indi mabaton sang pamilya nga gilayon ginpalubong ang ila 77 anyos nga amay sa Jordan, Guimaras.
Suno sa pamilya, may diabetes ang ila amay kag may yara na nga daan sang mga komplikasyon.
Gindala ini sa Dr. Catalino Gallego Nava Provincial Hospital bangud naglain ang pamatayag kag nabudlayan mag ginhawa.
Apang napatay ini sang wala pa makaguwa ang resulta sang swab test.
Sa interview sang Bombo Radyo kay Mayor Emmanuel Galila, iya ginpahayag nga ginrekomenda sang ospital nga kinahanglan malubong sa sulod sang 12 tubtob 24 ka oras ang lawas bangud man sa ginapatuman nga health protocol agud masiguro ang safety sang tanan.
Suno kay Galila, bangud wala sang lugar ang ospital nga butangan sang lawas, nagdesisyon nalang sila nga ipalubong.
Ginkasubo naman ini sang pamilya sang 77 anyos bangud sa ulihi nga kahigayunan wala gid sila matagaan sang tyansa nga makita man lamang ang ila nga amay.
