ILOILO CITY – Ginpahanugutan sang Sandiganbayan si President-elect Ferdinand “Bongbong” Marcos, Jr. kag ang iya pamilya nga magpresentar sang ebidensya agud nga depensahan ang ila bahin may kaangtanan sa ill-gotten wealth case nga gin-file batuk sa ila sang 1987.
Sa 13 ka pahina nga resolution, gin-deny sang anti-graft court ang motion nga gin-file sang Philippine government nga nagadeklarar nga ang mga defendants ang nag-waive sang ila kinamatarong nga magpresentar sang ebidensya bangud sang bangud sang kapaslawan nag magpakita sa court hearing sang August 13, 2019 nga naghatag sa ila sang tyempo nga magpresentar sang ebidensya.
Ang Civil Case 0014 ang naga-akusar sa Panlilio couple nga sanday Rebecco kag Erlinda nga gina-alegar nga business associates sang anay diktador nga si President Ferdinand Marcos kag asawa sini nga si Imelda pinaagi sa pagtindog nga dummies sa pag-acquire sang ownership kag control sang Ternate Development Corp., Monte Sol Development Corporation, Olas del Mar Development Corporation, Fantasia Filipina Resort, Inc., Sulo Dobbs, Inc., Philippine Village, Inc., Silahis International Hotel, Inc., kag Hotel Properties, Inc. pinaagi sa pag-secure sang financial assistance nagikan sa government institutions sa liberal terms sang ila financial interest.
Ang kaso ang naga-alegar man nga ang Panlilio couple, ang mag-asawa nga Modesto Enriquez kag Trinidad Diaz-Enriquez, Leandro Enriquez, Guillermo Gastrock, Ernesto Abalos kag Gregorio Castillo ang nagpulos sang ila close relationship sa mag-asawa nga Marcos pinaagi sa paghimo sang pila ka schemes kag strategies agud nga mapamanggarano ang ila kaugalingon gamit ang kaban sang gobyerno.
Suno sa Sandiganbayan, nagakadapat lang nga hatagan sang tsansa ang pamilya Marcos nga mapamatian.
Gin-cite sang korte ang Supreme Court ruling sa Regalado Samartino vs. Leonar Raon et. al. case kun sa diin, ginpahanugutan sang korte nga mangin liberal sa interpretation sang mga rules.
Suno sa Sandiganbayan, ang mga korte ang ginbutang agud nga mag-adjudicate sang mga kontrobersiya.
Ang ruling nga gin-issue sang Sandiganbayan Second Division ang pirmado ni Associate Justices Arthur Malabaguio, Oscar Herrera kag Michael Frederick Musngi.
