ILOILO CITY – Ginakwestyon sang isa ka pamilya kun ngaa ginbutang ang ila amay sa isa ka COVID-19 Emergency Room sang isa ka ospital sa syudad sang Iloilo apisar nga may ginpakita sila nga negative result sang RT-PCR test.
Ang amay amo si Cenforoso Xerxes, 50 anyos.
Sa interview sang Bombo Radyo kay Jessica Quimbo, anak ni Xerxes, iya ginpahayag nga Setyembre 26 sang nag paidalom sa RT-PCR test ang iya amay bilang requirement antes ini magpa-opera sa iya nga hernia kag nagguwa nga negatibo ang resulta sang amo man nga adlaw apang nakuha na nila ang kopya sang Setyembre 28.
Kahapon, Oktubre 1 sang gulpiyada lang nga indi makaginhawa ang iya amay kag gindala ini nila sa isa ka ospital sa syudad.
Sang gin X-Ray ang amay, nagguwa sa resulta nga may yara ini sang pneumonia kag suno kay Quimbo, wala sang nasambit nga balatian sadto ang iya amay.
Ginapahayag sang anak nga gibutang sa COVID-19 Emergency Room ang iya amay apisar nga ginpakita nila ang negatibo nga resulta sang COVID-19.
Ginkasugtan sang pamilya nga butangan sang tubo ang ila amay agud nga makaginhawa apang wala na nasarangan kag ini ang nagtaliwan.
Sa subong, naga-apelar ang pamilya nga indi pag-icremate si Xerxes kag kun mahimo hatagan lamang sila sang isa ka adlaw agud nga mahatag man sang maayo ang lulubngan sang ila amay.
Bukas naman ang Bombo Radyo sa paathag sang ospital.
