TUBUNGAN, ILOILO – Nagapati ang pamilya nga ginhimuslan antes ginpatay ang 13 anyos nga dalagita nga kalabera na lang sang nasapwan sa Brgy. Adgao, Tubungan, Iloilo.
Sa interview sang Bombo Radyo kay Jelly Tagnawa, utod sang biktima, iya ginpahayag nga antes pa man nadula ang dalagita sang Oktubre 3, 2018, nakita pa sang iya hinablos nga babayi nga nagalakat ang biktima.
Suno kay Tagnawa, ginabanta nga pasado 5:00 na sang hapon sang nagpauli ang biktima kag ginapahayag nga may naghagad sa iya pabalik sa Bangga Agdao nga 2 ka kilometro ang distansya sa ila balay sa Brgy. Tabat.
Ginpahayag ni Tagnawa nga naga-eskwela sa Camangahan National High School sa Brgy. Camangahan sa banwa sang Guimbal ang iya manghod kag sang amo nga adlaw, naga-isahanon lang ang biktima sa pagpauli.
Sa sulod sang duha ka tuig, ginpahayag sang natungdan nga wala gid sila sang ideya kun ano ang natabo sa iya utod tubtub nga sang damlag lang, nakita ang uniform, school ID kag iban pa nga gamit sang biktima, 30 metros gikan sa lugar kun sa diin nakita ang tul-an.
May kaangtanan diri, nagasinggitan sang hustiya ang pamilya Tagnawa kasunod sang makahalanusbo nga gindangatan sang ila himata.
