BAROTAC NUEVO, ILOILO – Mabaskog ang pagpati sang pamilya nga may kaangtanan sa quarry operation ang pagluthang-patay sang riding-in-tandem suspects sa quarry operator sa Zamora Corner Siaotong St., Brgy. Ilaud Poblacion, Barotac Nuevo, Iloilo.
Sa interview sang Bombo Radyo kay Annabelle Almarza, tiayon sang biktima nga si Conrado ‘Boy’ Almarza III sang Brgy. Cruz sa nasambit nga banwa, iya ginpahayag nga wala na sang iban pa nga rason sa pagpatay sang iya bana kundi ang tuhoy sa quarry operation.
Suno kay Mrs. Almarza, kahapon sang aga bag-o natabo ang krimen, gindul-ong pa sang iya bana sa eskwelahan ang ila mga kabataan.
Pagka 10:00 sang aga, ginpahayag ni Mrs. Almarza nga magatambong pa kun tani sila nga mag-asawa sa hearing para sa approval sang quarry permit apang wala na nakapauli ang biktima.
Kun quarry operation ang pagahambalan suno kay Mrs. Almarza, wala naman sang may nagapamalabag magluwas sa iya pakaisa nga si Nida Cahong.
Bag-o pa man natabo ang krimen, ginpahayag sang natungdan nga iya na nga ginpa-blotter sa Barotac Nuevo Municipal Police Station ang iya pakaisa bangud sa iya panagupnop nga may yara sang malain nga matabo sa iya bana.
Samtang, ginkumpirma naman ni Police Executive Master Sergeant Glen Fortunes, hepe sang Barotac Nuevo Municipal Police Station, nga ipaidalom na sa autopsy examination ang bangkay sang biktima subong nga adlaw.
Suno kay Fortunes, may yara sang pahanugot gikan sa pamilya nga ipaidalom sa autopsy examination ang bangkay.
