ILOILO CITY – Nagpasaka na sang supplemental complaint batok kanday Police Staff Sergeant Ricardo Cabrera Morante kag Police Master Sergeant Vernie Lui Escorial si anay Congressman Salvador “Buddy” Britanico, amay sang negosyante nga ginluthang-patay sa Nabitasan, LaPaz, Iloilo City.
Ang biktima amo si Delfin Britanico.
Sa exclusive interview sang Bombo Radyo kay Congressman Britanico, iya ginpahayag nga base sa imbestigasyon sang National Bureau of Investigation (NBI), gintuad ni PCpl. Joseph Andrew Poneles Joven nga siya amo ang nagserbe driver sang Mitsubishi Adventure nga gingamit sa pagpatay kay Delfin lakip na ang mga kaupdanan sini nga pulis sa sulod sang salakyan.
Sa sworn statement ni Joven, kaupod ang iya application nga mangin state witness nga ginfile sa Office of the Prosecutor General sa Department of Justice sa Ermita, Manila, ang mga kaupod niya sa sulod sang salakyan amo sanday Police Staff Sergeant Ricardo Cabrera Morante kag Police Master Sergeant Vernie Lui Escorial, nga amo ang iya gintumod nga nagtiro patay kay Delfin sa Iloilo River Boulevard sa Bgy. Nabitasan, La Paz, Iloilo City sang January 19, 2020.
Dugang pa sa sworn statement ni PCpl. Joven, ang iban pa nila nga kaupod sa salakyan amo sanday Police Staff Sergeant Michael Demegillo de Felipe kag Police Staff Sergeant Freddie Hibalo Libo-on.
Suno kay Britanico, ginbuyagyag ni Joven sa iya statement nga ang mayor nga nagtiro sa iya nga bata amo si Morante kag ang nagfinishing naman amo si Escorial.
Sa pihak sini suno kay Britanico, ang luyag gid lamang sang ila pamilya amo ang mahatagan sang nagakaigo nga hustisya ang kamatayon sang iya nga anak nga si Delfin.
Suno sa iya, mahim-os lamang sila kon makilal-an kag matumod ang nagpatay sa iya anak.
“So far as our family is concerned, what we are just interested is, sin-o ang nagtiro kag nagpatay sa bata ko..muna lang ang gusto namon i-prosecute in accordance with law.”
Sa subong, suno kay Britanico, gin-endorso na sang NBI sa Office of the Prosecutor General sa Department of Justice ang kaso sa diin patigayunon ang preliminary investigation.
Matandaan nga base sa imbestigasyon sang NBI, ang mga suspek amo man ang ginalantaw nga yara sa likod sang kamatayon ni Allen Muller nga ginpatay man antes kay Delfin sa Jaro sa ginbansagan twin shooting sang amo nga adlaw.
