Ginkumpirma sang Philippine National Police (PNP) nga nagpasugot na ang pamilya nga ipaidalom sa autopsy ang bangkay ni anay Department of Public Works and Highways (DPWH) Undersecretary Catalina Cabral.
Suno kay PNP Public Information Office chief Police Brigadier General Randulf Tuaño, naka-negosyar si Benguet Police chief Police Colonel Lambert Suerte sa pamilya nga magpatigayon sang autopsy.
Ini man ang rason kun ngaa na-retain si Suerte sa iya nga posisyon. Ang gin-relieve lamang amo si Tuba municipal police chief Police Major Peter Camsol bangud sa ginapahayag nga mishandling sa kaso.
Una na nga nagpamalabag ang bana ni Cabral nga magpa-autopsy pa bangud nga suno sa iya, kilala niya ang iya asawa. Nagapati ang bana nga aksidente lang ang natabo kun sa diin nag-unwind lang kuntani si Cabral sa Kenon Road kag aksidente nga nahulog sa pil-as.
Magluwas sa autopsy, nagmandu naman ang Department of the Interior and Local Government (DILG) nga magpatigayon man sang DNA test para ma-check ang bangkay.
Huwebes sang gab-i sang ginaalegar nga nahulog sa pil-as sa Kennon Road, Tuba, Benguet si Cabral. Wala pa na-establisar kun may yara sang foul play.
Sandig sa panaysayon sang driver, alas tres sang hapon sang Huwebes, samtang nagabyahe sila sa Kennon Road, naghingyo si Usec Cabral nga magdulog anay kag ibilin siya malapit sa Camp 4.
Ginbalikan niya ang anay DPWH official sang alas singko sang hapon, apang wala na ini nakit-an.
Nagbalik pa ang driver sa ila hotel sa Baguio City agud i-check kun didto si Cabral, apang wala man. Sang 7:00 na sa gab-i, nagbalik ang driver sa Kennon Road, apang wala gihapon nakit-an ang iya boss.
Nangayo na ini sang bulig sa pulis, kag sang 8:00 p.m., nakit-an ang lawas ni Cabral sa kilid sang Bued River sa idalom sang pil-as.
12:03 sang kaagahon sang Byernes, gindeklarar ini nga patay na.
Nahibaluan nga na-implicate si Cabral sa flood control corruption scandal, kag ginpatawag man anay sang ICI para sa hearing sang Lunes, apang wala ini nagsipot.#
