ILOILO CITY – Ginapreparahan na sang iya pamilya sa Mindanao ang pagpauli sang Ilonggo priest nga si Fr. Teresito “Chito” Suganob nga gin-hostage sang Maute terror group.
Ginpahayag sang utod ni Fr. Chito nga si Roquito “Boyet” Suganob sa interview sang Bombo Radyo Iloilo, nga sa karon ang sigurado pa lang sila nga sa Oktubre 24, magapauli ang iya utod sa Norala, South Cotabato.
Magatambong si Fr. Suganob sa ordinasyon sang duha ka pari sa ila lugar.
Magaatubang pa suno kay Boyet ang iya utod kay Presidente Rodrigo Duterte antes magpauli.
Nalangkag na sila suno kay Boyet nga mahakos kag maistorya si Fr. Suganob.
Magapatigayon man sang courtesy call sa alkalde sang Norala ang pari, samtang ginapreparar naman nila ang grand welcome para kay Fr. Suganob.