Dako ang pagpasalamat sang pamilya sang barangay kagawad nga gintiro-patay sa Brgy. San Rafael, Tigbauan, Iloilo sa tanan nga mga nagpakighunong kag nag-upod sa pagpanawagan sang hustisya.
Ini kadungan man sa adlaw sang pagdul-ong sa pinakaulihi nga palahuwayan sini.
Ang biktima sa insidente amo si Joevani Triste, residente sang nasambit nga lugar; samtang ang suspek naman amo si John Castro Jr.
Sa interview sang Bombo Radyo kay Jester Triste, hinablos ni Joevanie Triste, iya ginpasalamatan ang tanan nga nag-upod sa ila kalisod ilabi na sa adlaw sang lubong sang iya tiyo.
Suno kay Triste, ang pagpakita sang presensya sang pila ka mga indibidwal sa ila ang isa ka dako nga bulig agud nga mapahanumdom sa ila ang maayo nga hinimuan sang barangay kagawad.
Nagpangabay man ang natungdan sa kapulisan sang madasig nga pagproseso sang kaso agud nga makuha sang ila pamilya ang hustisya.
