DUMANGAS, ILOILO – Ginbali sang pamilya Poblador ang nangin pahayag ni Rev. Fr. Juan Parreñas, kura paroko sang Saint Augustine Catholic Parish Church sa Dumangas, Iloilo, kasunod sang iya paghatag sang pahayag tuhoy sa ginakaulamiran nga kontrobersiya.
Sa interview sang Bombo Radyo kay Delia Dimson, ika tatlo nga anak sang minatay nga si Punong Barangay Ananias “Tatay Ane” Poblador, iya ginpahayag nga wala na sang plano pa nga magpagamo ang ila pamilya ilabi pa nga tion subong sang kwaresma.
Suno kay Dimson, ang iya nga pagsabat ang may katuyu-an lang nga tadlungon ang sala nga pahayag ni Parreñas agud nga maplastar ang matuod nga natabo.
▶ ▶ Kura Paroko sang Dumangas, Iloilo, naghatag na sang sabat tuhoy sa ginakaulamiran nga kontrobersiya
Ginpahayag ni Dimson nga isa sa luyag niya athagon amo nga wala nagpangayo sang pasaylo ang ila pamilya bangud nga sa ila pagpati, wala sila sang sala nga nahimo.
Sang adlaw sang lubong, ginpangabay sang ila pamilya nga maka-angkon sang gamay nga tion para sa picture-taking bangud nga may hiwaton nga bunyag pagkatapos sang misa.
Gin-athag man sang natungdan nga antes pa man ang paghatag sang pahayag ni Parreñas kaina sang aga, ginpatawag sila sa Archdiocese of Jaro agud nga magpatawaray apang kasubong nga may dugang na ang pahayag nga ginbuy-an sang pari.
