AJUY, ILOILO – Wala ginlauman sang pamilya Rojas nga makuha pa nila ang hustiysa sa pagpatay kay anay Ajuy, Iloilo Vice Mayor Ramon Rojas.
Ini matapos ang pagdakop kay Vicente ‘Itik’ Espinosa nga amo ang ginatudlo mastermind sa pagpatay kay Rojas.
Sa interview sang Bombo Radyo kay Ajuy, Iloilo Mayor Jett Rojas, pakaisa sang anay bise alkalde, iya ginpahayag nga indi man lang magliwan sa ila si Espinosa kag wala nila ginlauman ang nasambit nga development.
Suno kay Rojas, 11 na ka tuig ang nakaligad kag ila na lang nga gintugyan sa Ginuo ang padulongan sang kaso.
Ginpahayag ni Rojas nga nagdumdum ang ila pamilya nga case closed na rason nga ila ginkakibot nga gindakop si Espinosa paagi sa warrant of arrest.
Sa madumduman ni Rojas, wala gid sila nakakit-anay ukon naka-istoryahanay ni Espinosa humalin sang ginpatay ang anay bise alkalde sang 2008.
Bangud sa nasambit nga development, ginpahayag sang natungdan nga nakadepende na sa kabataan kag sa mga utod sang iya pakaisa kun ano ang padulungan sang kaso.
