Gin-athag sang punong barangay sang Brgy. M.V. Hechanova, Jaro, Iloilo City nga lunsay may mga blotter reports batok sa isa kag isa ang pamilya Roscales kag Semeniego.
Ini kasunod man sang ginreklamo ni Engineer Brian Semeniego si Mervin Roscales nga iya manlang kaingod-balay.
Sa interview sang Bombo Radyo kay Punong Barangay Nestor Ledesma, iya ginpahayag nga madugay na nga nagabanggi-anay ang duha ka pamilya, kon sa diin, matapos nga magpa-blotter ang isa, mabalos man blotter ang isa.
Suno kay Ledesma, ang gintunaan gid sang ila indi pag-intindihanay, amo ang ‘tarog’ sang atop nanday Roscales bangud suno sa pamilya Semeniego, nagalapaw ini sa ila.
Gin-athag man sang punong barangay nga ang insidente ang una na nga na-report sa Office of the Building Official (OBO).
Natukiban man sang opisina nga ang ang duta nga ginatindogan sang ila tagsa ka balay ang wala sang nagapanag-iya, rason man nga wala sila napamatbatan.
Ginklaro naman ni Barangay Kagawad Ronnie Solido nga una nga wala ginpakita sang pamilya Semeniego sa kapulisan ang kuha sang closed circuit television ukon CCTV.
Ini agud kontani nga mangin ebidensya sa panumbungon batok sa pamilya Roscales.
Suno kay Solido, kontani napalantaw gilayon sa kapulisan ang video agud nga natigayon nga madakop si Mervin Roscales, apang ulihi na kag yara na sa Jaro Police Station sang ginpakita ini sang pamilya Semeniego.
Gin-athag man sini nga si Roscales mismo ang ginhaboy man sang mga botelya sang pamilya Semeniego samtang ini ang nagpanghampak sang kabilya sa gate.
Indi naman ini una nga bes natabo ang insidente bangud masami nga nagabaisay ang duha ka pamilya.
