ILOILO CITY- Nagahilibion nga nagapakitluoy ang pamilya sang bana ni Rodelyn Sumbong nga timbang sang ginpatay nga si Claire Diergos, nga kuntani indi sila pagdalahigon sa natabo.
Sa interview sang Bombo Radyo kay Jessica Ganuhay sang Cabilauan, Barotac Nuevo, Iloilo kag ugangan ni Rodelyn, iya ginpahayag nga humalin sang naulamid ang pangalan sang iya umagad sa kaso sa pagpatay kay Diergos nga nasapwan sa sulod sang iya salakyan sa Inangayan, Sta. Barbara, Iloilo, nabalaka na sila sa ila seguridad.
Suno sa iya, kun kaisa, may makit-an sila nga makaduluda nga tawo nga kaangay nga nagapanilag sa ila balay.
Nagapangabay si Ganuhay nga makonsensya kag mag-ako na ang sin-o man nga responsable ukon may ihibalo sa krimen agud nga indi na madalahig ang mga pamilya nga wala man sang hinalung-ong kag kahilabtanan sa natabo.
