Nagasinggitan sang hustisya ang pamilya kag himata sang 36 anyos nga babaye nga nasapwan-patay sa Barangay Inangayan, Sta. Barbara, Iloilo.
Ang biktima amo si Claire Diergos, single nga iloy, kag residente sang Barangay Dagsaan, Buenavista, Guimaras apang nagapuyo man sa Deca Homes Subdivision sa Pavia, Iloilo.
Sa interview sang Bombo Radyo kay Barangay Kagawad Ruth Garvillo sang Dagsaan, Buenavista, Guimaras, tiya sang biktima, iya ginapahayag nga tuman ang ila kakibot matapos naglupok ang balita may kaangtanan sa brutal nga pagpatay sa iya nga hinablos.
Suno kay Garvillo, halos indi siya makapati nga natabo ini sa iya hinablos bangud tuman ini ka mabuot, hipuson, kag ma-inabyanon.
Dugang pa ni Garvillo, bulan sang Marso pa sini nga tuig sang nakapauli si Diergos sa Barangay Dagsaan.
Samtang, gin-ako man sang tiya nga wala gid nila makilal-an ang ginapahayag ‘Alog’ nga napamana ni Diergos.
