𝗜𝗟𝗢𝗜𝗟𝗢 𝗖𝗜𝗧𝗬 — Personal nga nagpadulong kay Iloilo City Mayor Jerry Treñas ang pamilya sang lalaki nga napatay matapos nga nabunggo ang motorsiklo sini sa isa ka trailer truck sa Brgy. Loboc, Lapuz, Iloilo City.
Ang biktikma amo si Jessmark Gabral, 23-anyos, kag residente sang Brgy. Mansaya, Lapuz, Iloilo City.
Sa interview sang Bombo Radyo kay Jesse Gabral, barangay kagawad sang Mansaya, Lapuz kag amay sang biktima, iya ginpahayag nga nagpasalig si Mayor Treñas nga hatagan sang nagakaigo nga haya kag desente nga lubong ang iya nga anak.
Suno kay Gabral, wala pa sang adlaw nga na-set agud nga magkitaay sila sang operator sang trailer truck nga amo ang nabungguan sang motorsiklo sang iya nga anak.
Nagalaum man ang natungdan nga dapat mapaathag sa ila kon ngaa yara ang truck sa dalan apisar nga ginadumilian nga mag-park sa amo nga lugar.
Nagapanindugan man ini nga kon wala naka-park ang trailer truck sa dalan, buhi pa kontani tubtob subong ang iya nga anak.
Preparado naman ang ila pamilya sa kon ano ang legal nga mga tikang nga masunod himuon agud nga mahatagan sang hustisya ang kamatayon sang ila único hijo.
