Pilas sa tangkugo nga ginapatihan tuga sang paglampos ang nakit-an sa biktima nga nasapwan patay kag gintabunan sang hilamon sa talamnan sa Brgy. Banuyao, La Paz, Iloilo City.
Ang biktima amo si Mark Henry Alpasan,29, residente sang Concepcion, Iloilo City Proper.
Sa interview sang Bombo Radyo kay Charmaine Alpasan, asawa sang biktima, iya ginpahayag nga wala na sang may nakit-an pa nga pilas sa iban nga bahin sang lawas kay Mark magluwas lang sa iya ulo.
Suno sa asawa, mabuot kag wala sang bisyo ang iya bana gani mismo siya ang wala sang ihibalo kun ano ang motibo sa pagpatay sa biktima.
Samtang nagahilibi-on naman ang iloy ni Mark bangud indi ini makapati nga ginpatay ang iya anak.
Suno kay Josie Alpasan, mahimo nga na-trippingan lang ang iya anak bangud wala man ini sang kontra kag mainabyanon nga sahi sang tawo.
Ginpaandaman naman sang iloy sadto pa lang si Mark nga delikado magbyahe sang tricycle kun kaagahon apang nagkampante ini bangud pahayag niya, wala siya sang dapat nga ikakulba bangud wala man siya sang sala sa tawo.
