ILOILO CITY – Padayon nga ginapangita sang mga otoridad ang 22-anyos nga dalaga matapos nga ginapahayag gin-abduct sa Sitio Casamata, Central, Ajuy, Iloilo.
Sa interview sang Bombo Radyo Iloilo ka C/Insp. Charlie Sustento, hepe sang Ajuy Municipal Police Station, ginpahayag sini nga ginsulod sang mga armado nga lalaki ang puluy-an sang biktima nga si Renelyn Love Ira kag pilit ini nga ginpaupod sa ila.
Suno kay Sustento, isa sa ginalantaw nila nga motibo sa pag-abduct sa biktima ang ginapahayag illicit affair sini sa isa ka negosyante nga may asawa.
Sa eksklusibo nga interview sang Bombo Radyo Iloilo, ginpahayag ni April Ira, utod ni Renelyn, diretso nga nagsulod sa ila balay kag sa hulot sang biktima ang mga suspek.
Nagbilin pa ang mga suspek sang mensahe sa mga ginikanan sang dalaga nga indi ang mga ini magkabalaka bangud ibalik nga wala sang gasgas ang ila bata sa sulod sang duha tubtob tatlo ka adlaw.
May luyag lang mag-istorya sa dalaga kag “bayad” na ini sa ila.
Suno kay Sustento, narekober ang motorsiklo nga gin-gamit nga getaway vehicle, sa kaiping nga barangay.
Nagpanawagan naman ang pamilya sang biktima nga indi paghalitan ang ila bata kag kun mahimo, ibalik na ini sa ila.
Suno pa kay April, madugay na nakabaton sang pamahog ang iya utod, apang ginbalewala lang nila ini.