Lunsay negatibo sa reverse transcription polymerase chain reaction (RT-PCR) test ang apat ka myembro sang pamilya sang Delta COVID-19 variant patient nga taga-Cabatuan, Iloilo.
Ang 32 anyos nga pasyente nga babayi ang napatay na sang nagligad nga Hulyo 29 kag amo ang ginreport nga first patient ukon first local case sang Delta COVID-19 variant sa probinsya sang Iloilo.
Matandaan nga antes napatay sang Hulyo 29 sang kaagahon, nakuhaan siya sang swab sample kag napaidalom sa genome sequencing kag nag-gwa nga may yara sang variant of concern.
Sa interview sang Bombo Radyo kay Cabatuan, Iloilo Mayor Ronilo Caspe, iya ginapahayag nga wala sang close contact ang amo nga pasyente bangud nagpositibo ini sa virus samtang na-admit sa ospital tubtob ginbawian sang kabuhi.
Apisar sini suno kay Caspe, nagpaidalom sa swab test ang pamilya sang 32 anyos agud nga masigurado nga wala sang dapat kabalak-an ang mga tawo sa palibot sa tion nga magpatigayon sila sang haya.
Sa subong, ginahulat na lamang sang pamilya nga ma-transfer ang bangkay sang ila himata sa ila nga balay.
