Ginahulat na lang sang Zarraga Municipal Police Station ang pag-file sang kaso sang pamilya sang duha ka mga babaye nga nabungguan-patay sang isa ka van Brgy. Tubigan, Zarraga, Iloilo.
Ang driver amo si Mary Grace Condino Mandate, 30-anyos, kag residente sang Brgy. Bolilao, Mandurriao, Iloilo City, samtang, ang backrider naman amo si Mara Heradora Cordova, 31-anyos, residente sang Brgy. Poblacion, Bago City, Negros Occidental.
Ang driver sang van naman amo si Jerry Tolentino Gonzales, 53-anyos, kag residente sang Ledesma St. Pototan, Iloilo.
Sa interview sang Bombo Radyo kay PCapt. Dandy Ilalto, Hepe sang Zarraga Municipal Police Station, iya ginpahayag nga may nagpadulong na sa ila talatapan ang pamilya sang isa ka babaye nga biktima.
Suno kay Ilalto, posible nga ipasaka sa suspek amo ang reckless imprudence resulting to multiple homicide.
Gin-athag man sini nga indi hubog ang suspek kag wala makitaan sang ano man nga makahulubog nga ilimnon.
Kon balikan, naghalin sa Dumangas Port ang motorskilo kag padulong kuntani sa syudad sang Iloilo, samtang ang van naman padulong sa Banwa sang Dumangas.
Base sa inisyal nga imbestigasyon, madasig ang pagpadalagan sang duha ka salakyan.
Matapos magluntad ang insidente, gilayon nga nanaog sa van ang driver kag nagsakay sa tricycle agud magpadulong sa Leganes Municipal Police Station kag didto magsungka, gilayon naman ini nga ginturn-over sa Leganes MPS sa Zarraga MPS.
