Indi na magpasaka sang kaso ang pamilya sang duha ka mga biktima sakay sa motorsiklo nga napatay matapos makabunggo sa tricycle sa Barangay Guinacas, Pototan, Iloilo.
Ang mga ginbawian sang kabuhi amo sanday Ramy Pineda nga amo ang driver sang motorsiklo kag ang backrider nga si alias Tisoy, lunsay residente sang Barangay Balanac, Janiuay, Iloilo.
Sa interview sang Bombo Radyo kay Police Staff Sergeant Mark Parreño, imbestigador sang Pototan Municipal Police Station, iya ginpahayag nga base sa ila imbestigasyon, may yara man sang sala ang motorsiklo bangud madasig ang pagpadalagan sang mga biktima.
Sa pagkamatuod, ang tricycle nga ginamaneho ni Joemarie Campanillo, 27 anyos, residente sang Barangay Borong, Pototan, Iloilo ang nag-signal light na antes pa man ini nagliko.
Sa pihak sang natabo, handa man nga magbulig ang driver kag tag-iya sang tricycle sa pagpalubong sa duha ka mga biktima.
