Nagapabilin nga missing ang duha ka mga kabataan sa Barangay Baldoza, La Paz, Iloilo City.
Ini amo sanday John Ronald Linagad, 4-anyos, kag Camelle Zhynn Jareol, 5-anyos, residente sang nasambit nga lugar.
Sa interview sang Bombo Radyo kay Perlita Asturias, lola ni John Ronald, iya ginpahayag nga ulihi nila nakit-an ang bata sa sulod man sang ila balay kon sa diin, nagsiling pa ini nga nagutom, rason nga nagsukad sang kan-on ang iloy sini.
Suno kay Asturias, sang nagbalik na ang iloy sang bata, wala na nila ini makit-an nga nagtuga man sa ila sang kakugmat.
Ginpahayag man sini nga gilayon sila nga naglibot sa ila lugar agud pangitaon ang bata, apang wala nakit-an.
Gin-athag man sang natungdan nga magkaupod ang iya apo kag si Camelle Zhynn antes sila lunsay nadula.
Nagahilibion naman nga nagpanawagan ang iloy sang bata nga ibalik ang iya anak.
Ginlaragway man sang iloy nga ang iya ulihi nabatian nga tinaga antes nadula ang iya bata amo ang “Mama sukadi ‘ko kan-on kay ma-eat na ako.”
Nahibaluan nga pasado alas-10:00 kaina sang aga sang nadula ang mga kabataan, kon sa diin, ulihi nakit-an sang mga residente nga nagahampang.
