ILOILO CITY – Indi kumbinsido ang pamilya sang “Doctor to the Barrios” nga napatay na ang isa sa mga suspek nga nagluthang sa iya anak sa Purok-4, Barangay Maranding, Kapatagan, Lanao del Norte.
Sa interview sang Bombo Radyo Iloilo kay Batan, Aklan, Sangguniang Bayan (SB) member member Dennis “Bocay” Perlas, nagapati ini nga iban nga tawo ang napatay sang mga pulis sang damlag lang sa Lanao del Norte nga ginapahayag suspek sa pagluthang sa iya anak nga si Dr. Dreyfuss Perlas.
Suno sa amay, lain nga kaso ang kaundan sang warrant of arrest nga ila ginserbe sa ginatudlo isa sa mga suspek sa krimen.
Ginpahayag sini nga ang ginpatay nga suspek ang may pending nga kaso nga double murder kag homicide.
Apang sa gihapon, wala sila nagakadulaan sang paglaum nga maangkon ang hustisya.
Samtang ginpagwa na ang resulta sang autopsy examination sa bangkay ni Dr. Perlas.
Suno kay Dr. Joe Martin Fuentes, medico legal officer sang Capiz Crime Laboratory, natukiban nga nag-angkon sang igo sang bala si Dr. Perlas sa likod nga naglapos sa iya dughan, baga kag gusok.
Naghalin sa medical mission si Dr. Perlas kag sang pauli na sa iya ginarentahan nga balay, gin-ambush sang mga armado nga lalaki nga nakasakay sa pribado nga salakyan sa Purok-4, Barangay Maranding, Kapatagan, Lanao del Norte.