ILOILO CITY – Hustisya ang ginasinggitan sang pamilya ni Joanna daniela Dimafelis, ang Pinay nga ginpatay sa Kuwait kag ginbutang sa freezer.
Sa exclusive interview sang Bombo Radyo Iloilo, ginpahayag ni Crisanto Dimafelis, amay ni Joanna, handum nila nga manabat ang mga responsable sa pagpatay sa iya anak.
Nagpanawagan man ini sa mga ahensiya sang gobyerno nga buligan sila nga madala pauli sa Iloilo ang bangkay sang Ilongga OFW.
Suno sa amay, wala sila sang ihibalo nga may malain na nga natabo sa iya anak.
Duha na ka tuig suno kay Mr. Demafelis nga wala sila komunikasyon kay Joanna.
Apang nagkampante man sila bangud ginpahayag sadto sang ila bata nga maayo man ang kahimtangan sini sa Kuwait.
Rason nga amo na lang ang ila kakibot suno kay Mr. Dimafelis sang mahibaluan nga patay na ang anak.