BAROTAC NUEVO, ILOILO– Desidido ang pamilya nga mahatagan sang hustisya ang kamatayon sang quarry operator nga ginluthang-patay sang riding in tandem sa Zamora Corner Siaotong St., Brgy. Ilaud Poblacion, Barotac Nuevo, Iloilo.
Sa interview sang Bombo Radyo kay Mrs. Anabelle Almarza, tiayon sang biktima nga si Conrado “Boy” Almarza III sang Brgy. Cruz sa nasambit nga banwa,iya ginpahayag nga nagahingyo siya sang bulig sang Philippine National Police agud gilayon nga masolbar ang kamatayon sang iya nga bana.
Suno kay Almarza, handa siya nga maghatag sang mga impormasyon nga kinahanglan agud nga makabulig sa imbestigasyon.
Samtang, ginatudlo gid ni Mrs. Almarza ang iya paka-isa nga si Nida Cahong nga posible rason kun nga-a natabo ang krimen.
Subong nga adlaw, ginpatigayon ang autopsy examination sa bangkay sang biktima.
