ILOILO CITY-Kumbinsido sang pamilya sang ginpatay nga si former Punong Barangay Ernie Poral sang Ingore, La Paz nga ginsugo lang si Nilo Guardaya, ang suspek sa pagpatay sa anay opisyal.
Sa interview sang Bombo Radyo kay Edwin Poral, utod sang biktima, iya ginpahayag nga napat-ud nila nga indi kilalahay kag indi kontrahanay ang iya utod kag si Guardaya.
Suno kay Poral, indi basta-basta ang tawo nga ila ginapatihan nga amo ang nagsugo agud ipapatay ang iya manghod.
Suno sa iya, posible nga ang personalidad sang utod nga nagapanindugan sa prinsipyo ang rason kun ngaa ginpapatay ini.
Nahibaluan nga may isa ka proyekto sa Ingore nga ginapamatukan sang anay punong barangay apang wala nila ginakumpirmar nga may kaangtanan gid man ini sa natabo sa anay punong barangay.
