ILOILO CITY – Nagapanawagan sang hustisya ang pamilya sang biktima nga gintiro sang Sangguniang Kabataan (SK) Federated President sang banwa sang San Miguel, Iloilo sa Barangay San Jose sa amo nga banwa.
Ang suspek amo si Mikhail Tadifa, 24, residente sang Barangay 11.
Samtang ang biktima amo si Dyezrelle Malaygay, 30, residente sang Barangay San Jose.
Sa interview sang Bombo Radyo sa iloy sang biktima nga si Sylma Joy Malaygay, tuman ang ila pagpasalamat bangud nga daplis gid lamang sa ulo ang naagum nga pilas sang iya bata.
Suno pa sa iya, antes natabo ang pagpaniro, may yara sang mga motor nga nag-agi sa ila balay rason nga ginpapatay sang iya bata ang suga.
Personal man niya nga nasaksihan ang pagtiro sang SK president sa iya anak.
Posible pa suno sa iya nga sila ang matiruhan man kun naglupok liwat ang pusil.
Kung madumduman, nagbai-say ang suspek kag biktima sa social media bangud sa schedule sang basketball tournament.
Magluwas sini, may iban na nga kaso nga ginapangatubang ang SK president.
Sa subong, yara na sa hilway nga kahamtangan ang biktima.
