ILOILO CITY – Nagtinir pa sang pila ka adlaw sa ospital bag-o napatay bangud sa Dengue Hemorrhagic Fever ang Grade 1 pupil sang Zone 2, Brgy. Tacas, Jaro, Iloilo City.
Sa interview sang Bombo Radyo kay Mylene Hortillo, iloy sang biktima nga si alayas Nonoy, iya ginpahayag nga sang nagligad nga Hulyo 9 sang gab-i, ginhilanat ang iya anum ka tuig nga anak.
Sang Hulyo 10 sang kaagahon, ginpahayag ni Hortillo nga ginkumbulsyon si Nonoy rason nga ila nga gin-admit sa hospital.
Bangud nga prematue ang iya anak sang ginbun-ag, ginpahayag ni Hortillo nga ginpanugyan sang doktor nga ipaidalom sa Meningitis test si Nonoy apang nagnegatibo ang resulta sang laboratory test.
Ginpaidalom naman sa Dengue test si Nonoy kag nagpositibo ang biktima nga gilayon man nga gindapatan sang nagakaigo nga pagbulong.
Pagkaligad sang duha ka adlaw, nadula ang hilanat ni Nonoy apang nagsakit kag naghabok naman ang iya nga tiyan.
Ginpahayag ni Hortillo nga tuman nga naapektuhan ang utok ni Nonoy nga gintunaan sang iya kamatayon.
Indi naman matumod sang iloy kun sa diin nakuha sang iya anak ang nasambit nga balati-an bangud nga sa ila balay, nagapaninlo man sila kag nagapamanyos sang mosquito repellents samtang nagapatigayon man sang general cleaning sa Iloilo Central Elementary School kun sa diin naga-eswela ang biktima.
