Tuman ang kasubo sang pamilya sang isa ka Guimarasnon samtang nagapanawagan sang bulig sa gobyerno pinaagi sa Bombo Radyo agud mapapuli ang bangkay sang ila himata nga nagatrabaho sa Pampanga.
Ang biktima amo si alyas Remrem, kapin duha ka tuig nga nagatrabaho sa Pampanga, kamagulangan sa lima ka mag-utod kag residente sang Barangay Poblacion, Nueva Valencia, Guimaras.
Sa interview sang Bombo Radyo kay Eden Nonifara, iloy ni Remrem, iya ginpahayag nga naglain ang iya buot sang mahibal-an nga nadisgrasya ang iya anak sa diin nahulog ini halin sa ikaduha nga panalgan sang building sa diin ini nagatrabaho.
Suno kay Nonifara, nagtawag pa ang iya anak sa diin nagapabutyag pa ini sang kahidlaw sa iya mga utod kag nagapromisa nga kun makapauli makaon pa sila isa ka restaurant upod ang bilog nga pamilya.
Ginpahayag sang iloy nga nakainom ang iya anak upod iya mga katrabaho nga lunsay nakalockdown sa ila building nga gina-obrahan sa Pampanga sang mahulog ini halin sa duha ka panalgan sa diin nabali ang iya mga tiil nga gintunaan sang iya kamatayon.
Nagapangayo naman sang bulig ang iloy sa gobyerno nga kuntani madala na pauli ang bangkay sang iya anak.
