Madugay na nga ginapangamuyo sang pamilya Claveria nga madakpan na ang suspek sa pagpatay sa Ilonggo Overseas Filipino Worker (OFW) nga nasapwan sa sulod sang septic tank sa South Korea.
Sa exclusive interview sang Bombo Radyo kay Mary Mae Calveria, utod sang biktima nga si Angelo Claveria sang Brgy. Poblacion Rizal Ilawod, Cabatuan, Iloilo, iya ginpahayag nga nahaw-as ang kasubo nga ginabatyag sang ila bug-os nga pamilya bangud nga nadakpan na ang suspek.
Ginpahayag ni Mary Mae nga madugay naman nila nga ginadudahan si Yuguslav Magtoto nga amo ang suspek sa pagpatay kay Angelo apang indi man nila mabuyagyag bangud nga wala man sila sang pamatuod.
Ginpahayag ni Mary Mae nga si Magtoto ang masami nga kaupod sang iya utod kag masami nila nga makita sa mga social media post ni Angelo.
Ginakabig naman sang pamilya nga naangkon na ni Angelo ang hustisya bangud nga nadakpan na si Magtoto sang National Bureau of Investigation (NBI) sa Candaba, Pampanga.
Sa subong suno kay Mary Mae, ginatugyan na nila sa otoridad kun sin-o ang magakostudiya kag kun ano ang madangatan si Magtoto.
