Nagasinggitan sang hustisya ang pamilya sang napatay nga nagabusong nga iloy kag iya lapsag matapos ginapahayag ginkastigo sa Zone 5, Boulevard, Molo, Iloilo City.
Ang biktima amo si Lorry Mae Baylon, 27, kag residente sang nasambit nga lugar.
Samtang ang mga suspek naman amo ang mag-asawa nga Chona Agana, isa ka maestra sa Molo 1 Elementary School kag bana niya nga si retired Police Staff Sergeant Joseph Agana.
Sa exclusive interview sang Bombo Radyo kay Dory Walawad, tiya sang biktima, iya ginapahayag nga nag-umpisa ang tanan sang Marso 24 sa diin nagwangal ang mag-asawa nga Agana sa pila ka mga kabataan lakip na ang anak ni Baylon nga nagahampang kag nagaginahod sa atubang mismo sang balay nila.
Suno kay Walawad, gilayon nga ginsaway ni Baylon ang iya nga anak nga magpauli kag ginsinggitan nga indi na maghampang sa atubang sang balay sang mag-asawa agud indi mapasibangdan nga nagaginahod.
Pahayag ni Walawad, matapos mabatian sang mag-asawa nga Agana ang pagwangal ni Baylon, ginsulong kag ginpulihan nila ini nga gin-intrahan sang ila mga anak nga sanday John Cyril, Bebe kag umagad nga si Alfred.
Dugang sang natungdan, nakit-an kag nakuhaan nila mismo sang video kag gin-upload sa social media ang pagpangkastigo sa iya hinablos sang pamilya Agana.
Matapos sini suno kay Walawad, masami na nga nagareklamo si Baylon nga nagasakit ang iya tyan sa diin sang Abril 2, gindala siya sa Western Visayas Medical Center kag ginbun-ag sang wala sa oras ang iya anom ka bulan nga lapsag.
Apang makaligad ang isa ka oras sang nagwa ang lapsag, napatay ini.
Abril 3 sang gab-i sang ginbawian man sang kabuhi ang iloy nga si Baylon.
Sa subong suno kay Walawad, padayon sila nga nagapanawagan sang igtalupangod sa mga otoridad agud buligan sila kag mahatagan sang nagakaigo nga hustisya ang natabo sa iya nga hinablos.
