LAMBUNAO,ILOILO– Nadulaan sang isa ka mabuot kag mabinuligon nga bata ang pamilya Janolino sa pagtaliwan sang ila himata nga si Lynlyn Janolino nga isa sa napatay sa nagluntad nga pagkulob sang tatlo ka pumpboat sa Iloilo Strait.
Si Lynlyn Janolino ang isa man sa apat ka mga manunudlo sang Lambunao National High School nga napatay sa nasambit nga insidente.
Sa interview sang Bombo Radyo kay Leodilyn Janolino, iloy ni Maam Lynlyn iya ginlaragway ang iya bata nga mabuot kag mabinuligon sa iya mga manghod.
Suno sa iloy, madamo nga bulig na ang nahatag ni Lynlyn sa ila pamilya humalin sa pagbakal sang lote, pagpakay-o sang ila balay kag lakip naman ang pagpa eskwela sa iya mga manghod.
Dugang pa sang natungdan, nakaginhawa sila sang madalom sang nagpalab-ot sang mensahe si Lynlyn sa ila nga nagapasalig nga wala ini nakasakay sa nauna nga naglugdang nga motor banca apang ulihi nalang nila natukiban nga isa ini sa mga napatay sa nag kulob nga MB Jenny Vince.
Suno pa gid sa iloy sang manunudlo, wala sila naglaom nga matabo ang ini nga trahedya sa iya nga bata kag sa ila pamilya.
