ILOILO CITY – Ginakulbaan pa tubtub sa subong ang organizer sang Katilingban sang Imol sa Syudad (KAISOG) nga si Wilfredo Panuela sang Brgy. Bitoon, Jaro, Iloilo City.
Ini ang kasunod sang iya akusasyon nga ginpahog siya sang ginapahayag agent sang National Bureau of Investigation (NBI) kag Philippine Army sa iya mismo balay.
Sa interview sang Bombo Radyo kay Panuela, iya ginpahayag nga tubtub subong, indi siya makakaon sang maayo kag indi na siya makapadayon sang pagbaligya sang hampanganan bangud sa kahangawa nga may malain nga matabo sa ila nga mag-asawa.
Suno kay Panuela, ini ang labing una nga kahigayunan nga gin-harass sila may kaangtanan sa ila trabaho sa KAISOG nga isa ka cause oriented group nga natuon sa urban poor.
Gin-athag man ni Panuela nga indi sila makabig nga legal front sang New People’s Army (NPA) kag sa baylo, sila ang nagabulig sa mga pigado nga mahatagan sang relocation site kag iban pa nga bulig nga wala sang may ginapangayo nga kabaylo.
Bag-o pa man ang ginapahayag pagpamahog sang nagpakilala nga sanday Art Diaz nga NBI agent kag Rey Gomez nga agent sang Philippine Army, ginpahayag ni Panuela nga may tawo man nga nag-istorya kag nagpahog sa ila sadto nga mag-asawa nga may yara na sila sang pangalan sa ibabaw.
Wala lang matul-id ni Panuela kun anu ang ginatumod sang lalaki.
Sang nakaligad nga adlaw suno sa natungdan, nakumpirma paagi sa Closed Circuit Television (CCTV) sa Brgy. Hall nga may yara sang dala nga pusil ang ang duha ka mga agent.
Bangud sa kakulba, ginpahayag ni Panuela nga wala na siya nakapanumdum sang maayo agud nga mapreso ang duha ka agent.
Daku ang pagpati ni Panuela nga ang pagpamahog sa ila nga mag-asawa ang may kaangtanan sa ila trabaho sa KAISOG.
Ginpahayag ni Panuela nga indi nila personal nga kilala ang duha ka mga agent kag ila na lang nga nahibalu-an nga pangalan nanday Art Diaz kag Rey Gomez sang ginpatawag sila sa Brgy. Hall agud nga i-blotter ang natabo.
Samtang, nagahingyo naman sang hustisya si Mrs. Josephine Panuela kasunod sang ginapahayag pagpamahog sa ila nga mag-asawa.
Sa interview sang Bombo Radyo kay Mrs. Panuela, iya ginpahayag nga ginabanta pasado 9:00 sang aga sang nakaligad nga adlaw sang may nabati-an siya nga naglagpok ang pwertahan sang ila balay kag nabati-an ang pagbinaisay.
Ginpahayag man ni Mrs. Panuela nga sang iyagin-guwaan agud nga lantawon, nakita niya ang duha ka mga lalaki nga yara sa saguwa sang ila balay kag naga-istorya sa iya bana.
Nagtuga sang trauma sa ila pamilya ang natabo nga pagpahog sa ila nga mag-asawa.
