Padayon nga nagalibot ang imbestigador sang Iloilo City Police Station 1 (ICPS 1) agud nga ma-verify ang identity sang lalaki nga nasapwan nga wala na sang kabuhi kag nagalutaw sa Iloilo River sa Brgy. Concepcion, Iloilo City Proper.
Ang biktima ang ginabanta yara sa 50 tubtob 60-anyos kag may tattoo nga ‘Patumbaya Orig’ sa tiil, may yara man sa iya butkon nga naka-tattoo nga ‘I love you Iren Hellen’, samtang ‘Rowena’ naman sa tuo nga dughan sini kag ginabanta nga 5’2 ang kataason.
Sa interview sang Bombo Radyo kay Police Lieutenant Romelo Tabuyoc, Officer in Charge sang Iloilo City Police Station 1, iya ginpahayag nga tubtob subong, wala sa gihapon sang pamilya nga nag-claim sa lalaki kag nagakilala nga himata nila ini.
Suno kay Tabuyoc, padayon ang pagtipon sang mga impormasyon nga mahimo makabulig sa pagkilala sa lalaki.
Nagpanawagan man ang talatapan sa pamilya sang biktima nga magpakig-angot sa ila agud nga mahatagan sang kasanagan ang kamatayon sini.
Una na nga gintuad sang isa ka e-bike driver nga masami sini makit-an sa Plaza Libertad nga nagatulog kag nagalakat-lakat naman sa Monica Blumentritt, Iloilo City Proper.
