ILOILO CITY – Desidido nga magpasaka sang kaso ang pamilya sang mag-asawa nga nabungguan-patay sa Diversion Road, Mandurriao, Iloilo City.
Sa interview sang Bombo Radyo sa utod sang biktima nga si Alnie Dinah Osano, iya ginpahayag nga indi gid sila magpaareglo.
Sa pagkamatuod suno sa utod, ang isa pa nila ka utod ang magapauli sa syudad sang Iloilo agud nga magproseso sang pagpasaka sang kaso.
Ginpahayag man sang natungdan nga indi niya mabatas nga tulukon ang bangkay sang mag-asawa nga sanday Alnie Dinah kag Joe Marie Osano matapos ang makahalanusbo nga aksidente.
Samtang, kaso nga 2 counts of reckless imprudence resulting in damage to property with multiple homicide ang ipasaka kay June Paul Rufino Valencia, ang driver sang sports car.
Sa interview sang Bombo Radyo kay Police Staff Sergeant Rey Amihan, imbestigador sang Mandurriao Police Station, iya ginpahayag nga ila na nga ginahikot ang pagpasaka sang kaso batok sa driver nga si Valencia.
Magluwas sa pagpasaka sang kaso, ginatun-an man nila suno kay Amihan ang background sang driver.
