ILOILO CITY – Ginahitso na ang kaso batok sa hubog nga Indian national nga nagbunggo-patay sa isa ka medical frontliner sa Pison Avenue, Brgy. San Rafael, Mandurriao, Iloilo City.
Sa interview sang Bombo Radyo kay Celsa Jardio, iloy sang biktima nga si Henry Jun, iya ginpahayag nga subong nga adlaw, Mayo 26, ginhitso na nila ang pagpasaka sang nagakaigo nga kaso batok sa Indian national nga si Harjinder Gil, 44, nga driver sang kotse.
Suno kay Jardio, pila ka adlaw antes ang aksidente, namutikan niya nga kasubong nga maluya kag masubo ang dagway sang iya anak nga si Henry Jun apang wala niya ini ginhatagan sang atensyon.
Ginpahayag ni Jardio nga sang natabo ang aksidente, ang kamagulangan niya nga anak ang una nga nagresponde kun sa diin may yara pa sang pangalibutan si Henry Jun samtang ginadala sa hospital.
Santo sa autopsy, wala sang patal nga pilas sa ulo sang biktima bangud nga nakasuksok ini sang helmet apang ginpahayag sang Iloy nga wilwig ang isa ka hita sang iya anak bangud sa mabaskog nga impact sang pagkabunggo.
Nagdepensa pa ang Indian national nga wala niya natalupangdan ang motorsiklo nga ginaskayan sang biktima apang suno sa tatlo ka mga sakay sang motorsiklo nga naulamid sa aksidente, hubog ang driver sang kotse.
Nahibalu-an nga nagtuyo pa nga magpalagyo ang Indian national rason nga iya nabunggu-an ang isa pa ka motorsiklo kun sa diin naka-angkon sang minor injuries ang tatlo ka mga sakay.
