ILOILO – Nagapangayo sang update tuhoy sa ginapatigayon nga search and rescue operation ang pamilya sang mga missing nga Ilonggo crew sang naglugdang nga Gulf Livestock 1 sa Japan.
Sa interview sang Bombo Radyo kay Francisco “Bombet” Heler, pinuno sang Public Employment Service Office kag in-charge sang Task Force Bulig Ilonggo, iya ginpahayag nga humalin sang nakaligad nga adlaw, may mga pamilya na nga nagpalapit sa iya kag kay Iloilo Gov. Arthur Defensor Jr. agud nga magpangayo sang bulig.
Suno kay Heler, ginahingyo sang tagsa ka pamilya nga mahatagan sila sang pinaka-latest nga update tuhoy sa natabo nga trahedya tuga sang bagyo Maysak.
Bilang in-charge sang Task Force Bulig Ilonggo, ginpahayag ni Heler nga nagpakig-angot na siya sa manning agency nga amo naman ang nagapakig-angot sa concerned agencies agud nga matuman ang request sang pamilya.
Magluwas sa financial assistance, nagpromisa naman ang Gobernador nga magabulig ang Iloilo Provincial Government sa pagproseso sang mga dukomento nga kinahanglanon sang pamilya sang mga Ilonggo crew.
