ILOILO CITY – Indi na magpasaka sang kaso ang pamilya sang mga napatay sa pagbunggu-anay sang motorsiklo kag truck sa Barangay Bacuranan, Passi City.
Ang napatay amo ang driver sang motorsiklo nga si Jay-R Sencil, 21, kag residente sang Barangay Imbang, Passi City.
Patay man ang angkas sini nga si Zaldy Palomar, 23.
Pilason naman ang isa pa nila ka kaupod nga si Sherwin Buntog, 23, lunsay residente sang Barangay Bacuranan Passi City.
Ang driver sang truck amo si Alvin Dizon, 38, kag residente sang Barangay Duyoc, Dao, Capiz.
Sa interview sang Bombo Radyo kay Police Master Sergeant Jervin Palec, imbestigador sang Passi City Police Station, iya ginpahayag nga nagpasalig ang driver sang truck nga magahatag ini sang bulig pinansyal sa pagpalubong sa mga napatay kag paggasto para sa isa ka biktima nga padayon pa nga ginabulong sa hospital.
Kun balik-balikan, papuli na sa ila balay ang mga biktima sang nakabunggo ang ila ginasakyan nga motorsiklo sa nasugata nga truck.
Suno kay Palec, lunsay wala sang may ginasuksok nga helmet ang mga biktima rason nga nakaagum ang mga ini sang pilas sa ulo nga amo ang gintuna-an sang kamatayon sang duha ka mga biktima.
Sa imbestigasyon sang kapulisan, hinali lang nga nawad-an sang kontrol sang manibela ang driver sang motorsiklo.
Dugang pa sang natungdan, indi pa matumod kun bala, nakainom sang makahulubog nga ilimnon ang mga biktima.
