Ginkadismaya sang pamilya sang biktima nga naaksidente sa atubang sang Medicus Hospital sa Barangay San Rafael, Mandurriao sang Agosto 27 ang wala pagbulig sang personnel sang ospital sa ila himata.
Ginkilala ang biktima kay Orlando Homena, 30 anyos, residente sang Barangay Tacas, Jaro, kag isa ka delivery rider.
Sa interview sang Bombo Radyo Iloilo kay Jonathan Homena, utod sang biktima, iya ginpahayag nagalain ang ila buot bangud wala gilayon nahatagan sang atensyon ang biktima.
Ginpahibalo lamang sila sang Iloilo City Emergency Responders ukon ICER sang amo nga mga tinion nga ila pagadal-on ang biktima sa Medicus Hospital bangud wala na ini nagaresponde.
Sang pag-abot niya sa hospital, iya ginpahayag nga natakdan na sang tubo ang biktima.
Base sa panaysayon sang ICER, nadugayan ang pagresponde sa biktima bangud wala gilayon sang may nakakita sa iya.
Apang nakita niya sa isa ka video nga gin-upload sang isa ka concerned citizen nga nakita na sang mga gwardiya ang biktima kag kapila man gin-apura sang concerned citizen ang mga gwardiya nga magbulig sa biktima.
Apang wala gid sang isa man sa ila ang naghulag ukon nagbulig.
Sa ulihi, napilitan na lamang ang pamilya nga isaylo ang biktima sa Western Visayas Medical Center bangud wala na ang mga ini sang ikasarang sa pagbayad sa ila hospital bill.
Suno man kay Homena, nakaagom sang crack sa tuo nga bahin sang ulo ang biktima, nga ginalantaw nga amo ang nangin rason sang pagkamatay sang iya utod.
Ginapanawagan man niya nga tani sa masunod nga emerhensiya indi na pagpadugayon ang pagresponde kag dapat buligan gilayon agud may tsansa pa nga maluwas ang pasyente nga nagakinahanglan sang bulig.
Sa karon, nahaya na ang iya nga utod sa ila balay kag nagapangayo ini sang aktwasyon sa mga natungdan nga awtoridad agud indi na maliwat ang kaangay nga insidente.
