𝗦𝗧𝗔. 𝗕𝗔𝗥𝗕𝗔𝗥𝗔, 𝗜𝗟𝗢𝗜𝗟𝗢 —Ginbaton na lang sang pamilya sang isa sa mga napatay nga rebelde nga indi makita ang nawong sini sa lungon bangud man nga yara na sa advance state of decomposition sang nakuha sang militar.
Ini kasunod man nga nalakip si Vivian Torrato sa tatlo ka mga napatay nga rebelde matapos nagluntad ang engkwentro sa tunga sang 82nd Infantry (Banta-Laya) Battalion sang 301st Infantry Brigade, Philippine Army kag sang Regional Headquarters (RHQ) kag Central Front, Komiteng Rehiyon-Panay (CF, KR-P) sa Barangay Cabatangan, Lambunao, Iloilo sang Agosto 15, 2024.
Sa interview sang Bombo Radyo kay Winefred Torrato, utod ni Vivian, iya ginpahayag nga medyo namag-o sila sa set up sang haya sang ila utod bangud man nga nakasirado ang lungon.
Suno kay Torrato, wala naman sila sang mahimo bangud ini ang nangin kahimtangan sang ila nga utod.
Apang, gin-ako man sini nga naglaum man ang ila nga pamilya nga kontani mas temprano nga nakuha si Vivian agud bisan sa ulihi nga tinion, makit-an nila ang nawong sini.
Ginsaysay man sang natungdan nga nadesisyon na lang sila nga indi pagbuksan ang lungon agud indi man mabutang sa risgo ang ila ikaayong lawas.
Nakatalana naman nga ilubong sa Agosto 26, 2024 ang ginapahayag high ranking nga rebelde sa Sta. Barbara Public Cemetery.
