Nagpanawagan sang bulig sa gobyerno ang iloy sang Overseas Filipino Worker (OFW) nga nagatrabaho sa Lebanon nga napatay sa wala mahibal-an nga balatian sang damlag lang.
Ang OFW amo si Mary Aniver Bingbing, residente sang Barangay Acuit, Barotac Nuevo, Iloilo kag kapin duha na ka-tuig nga nagatrabaho bilang domestic helper sa nasambit nga pungsod.
Sa interview sang Bombo Radyo kay Alicia Bingbing, iloy ni Mary, iya ginpahayag nga ginkakibot na lang sang ila pamilya sang ginbalita sang iya anak nga yara na ini sa intensive care unit (ICU) sang isa ka ospital sa Lebanon.
Suno kay Bingbing, nakaistorya pa sila sa video call sang iya anak sa diin nabudlayan pa ini sa paghambal bangud gintakdan na ini sang tubo.
Ginpahayag sang iloy nga kuntani ginpahibalo man lamang sila nga pamilya sang ospital sa diin na-admit ang iya anak kun takdan sang tubo ang ila anak.
Gintughungan man suno kay Bingbing sang dugo ang iya nga anak sa diin ginpahayag nagsulong pa ang mga dugo sa panit ni Mary.
Dugang sang natungdan, una na ginpasalig sang amo sang iya anak nga kuntani papulion nila sa Pilipinas si Mary pinaagi sa private plane apang nagpamalabag ang Philippine embassy sa Lebanon kag nag-abiso nga sa isa ka ospital na lamang sa amo nga pungsod i-admit si Mary bangud delikado nga ibyahe ini sa tunga sang COVID-19 pandemic.
Nagapangayo man sang bulig si Bingbing sa gobyerno nga kuntani hatagan sila sang igtalupangod kag bulig agud mapapuli ang bangkay sang iya anak.
