ILOILO CITY – Nagpanawagan sang bulig sang pamilya sang isa ka Overseas Filipino Worker (OFW) sa Riyadh, Saudi Arabia bangud sa nagalala nga ginabatyag sa ikaayong lawas.
Ang OFW amo si Emily Silvestre kag residente sang Brgy. Balabag, Sta. Barbara, Iloilo kag nagpadulong sa Saudi Arabia sang Oktubre 14, 2021.
Sa interview sang Bombo Radyo kay Andrei John Silvestre, utod sang OFW, iya ginpahayag nga nagalain ang sitwasyon sang iya magulang sa gwa sang pungsod kag nagapalanghabok ang lawas.
Nagapangayo sang bulig ang iya magulang bangud ginapahayag nga ginapabay-an ini sang iya amo kag mangin sang iya agency.
Suno sa manghod, gusto sang iya magulang nga makapauli diri sa Iloilo bangud nagakahangawa ini nga indi na makapauli nga buhi.
Ginhimo naman ang tanan nga paagi suno sa manghod apang wala sa gihapon sang tsansa nga makapauli ang iya nga magulang.
Nagpadulong na sa Overseas Workers Welfare Administration (OWWA) ang pamilya apang wala sa gihapon sang update.
