ILOILO CITY – Ginarespeto sang pamilya sang Ilonggo priest nga hostage sang Maute group sa Marawi City ang desisyon sang Duterte administration nga indi makipagnegosasyon sa mga terorista.
Kasunod ini sang hirit sang rebelde nga grupo nga magpatigayon sang prisoner swap kun sa diin hilwayon si Fr. Teresito “Chito” Suganob kabaylo sang mga ginikanan kag utod sang Maute brothers nga pasimuno sa pagsabwag sang kinagamo sa Marawi.
Sa interview sang Bombo Radyo Iloilo, ginpahayag ni John Paul Larroza Lauron, pakaduha sang nasambit nga pari, kun sila ang masunod, gusto nila nga pasugtan ang hingyo sang terorista nga grupo para mahilway si Fr. Suganob.
Apang ila man ginakilala ang interes sang kadam-an kag nagsalig sila nga indi pagpabay-an sang gobyerno ang pari kag iban pa nga hostages.
Ginatugyan na lang sang pamilya Suganob sa Diyos kag sa gobyerno ang kaluwasan sang ila himata gikan sa kamot sang mga rebelde.
Una na ginpanindugan sang Malacanang ang no negotiation policy sa mga terorista.