𝗜𝗟𝗢𝗜𝗟𝗢 𝗖𝗜𝗧𝗬 — Desidido ang pamilya sang pulis nga napatay matapos ginbungguan sang van nga ginamaneho sang miyembro sang Philippine Coast Guard (PCG) sa Barangay Mansaya, Lapuz, Iloilo City.
Ang biktima amo si Police Staff Sergeant Jiven Libero,34, residente sang Badu, Calinog kag assigned sa Regional Headquarters Support Unit
Ang driver naman sang van amo si Seaman First Class Matt Anderson Olaguir,residente sang Ubay, Bohol, kag assigned sa Chaplain Service sang Philippine Coast Guard.
Sa interview sang Bombo Radyo kay Police Corporal John Diaz, imbestigador sang Traffic Enforcement Unit sang Iloilo City Police Office, iya ginpahayag nga gikan ang van sa Brgy. Loboc, Lapuz kag padulong sa Mansaya, apang nagcounterflow sa alagyan, rason nga nabungguan sini ang nasugata nga motorsiklo nga ginamaneho sang pulis.
Suno kay Diaz, sang nagresponde ang ila katapo, nakit-an sa area nga basa kag madulom ang dalan bangud wala sang street lights.
Ginpahayag man sini nga santo sa driver sang van nga coast guard, nagdanlog ang iya nga goma rason nga ginwaslik niya ang manobela sa wala nga bahin sang karsada.
Nahibaluan nga nagtabog gid ang helmet lakip ang biktima bangud sa tuman ka baskog nga impact sang pagbunggo.
Nag-agum naman sang pilas ang biktima sa iya nga ulo, kamot, kag tiil, nga nangin rason sang iya gilayon nga kamatayon.
